संतोष भेट... ईश्वरी संकेत...
दि. १२ जून २०२२
दर रविवारी मरीन लाईन्स चौपाटीची एक मार्गिका गाड्यांसाठी बंद असते. या निमित्ताने खूप खेळाडू हौशे नवशे चौपाटीवर असतात. आज एका ठिकाणी कराओके संगीत मैफल सुद्धा सुरू होती. खूप जण त्याचा आस्वाद घेत होते... गाणारे सुद्धा पट्टीचे होते... थोडावेळ थांबलो... गाणारे जास्त असल्यामुळे नंबर लागणे कठीण होते.
एव्हढ्यात परममित्र संतोषची शिर्केची भेट झाली... खूप महिन्यांनी भेटला होता संतोष... त्याच्या सह मुंबई पंढरपूर सायकल वारी केली होती... येत्या १८ जूनला पुणे पंढरपूर सायकल वारी करतोय... त्या अगोदर संतोषची भेट हा ईश्वरी संकेत होता...
गप्पा मारत मारत मासे घेण्यासाठी ससून डॉकला पोहोचलो. येथे संतोषने डॉकवर आलेल्या विविध पक्ष्याचे अफलातून फोटो टिपले... उत्कृष्ट फोटोग्राफर आहे संतोष... तेथील भारत हॉटेलमध्ये स्पेशल चहा पिताना... जुन्या आठवणींना उजाळा मिळाला...
संतोषकडे जीवनाकडे पाहण्याचा सकारात्मक भाव ठासून भरला आहे... वृद्ध आई आणि अपंग बहीण यांच्या सेवेत स्वतःला झोकून दिले आहे. तसेच स्वतः एका डोळ्याच्या विकाराने ग्रस्त... परंतु या बाबत परमेश्वराकडे कोणतीही तक्रार नाही. जे जीवन वाट्याला आले आहे... ते मस्त मजेत जगणे... हाच संतोषचा ध्यास... आणि सकाळचे दोन तास निसर्गात सायकलिंग करणे हाच श्वास... मान गये मेरे दोस्त...
या ऊर्जावान मित्राची भेट म्हणजे... पुणे-पंढरपूर ही २४० किमी सायकल सफर एका दिवसात पूर्ण करण्याचे प्रथम पाऊल होते... मन अपार संतोषाने भरून गेले होते...
आजची ४० किमीची सायकल सफर परममित्र संतोषला अर्पण...
सतीश जाधव
मुक्त पाखरे...
सतीश, तुझे अनुभव वाचताना एक विशिष्ट आनंद मिळतो. एकंदरीतच तुझा हा प्रवास मनाला उभारी देऊन जातो.
ReplyDeleteतुच्या पुढील प्रवासासाठी मनःपूर्वक शुभेच्छा !😊🙏🌹