१०७ वे रक्तदान आणि शाळकरी मित्र

१०७ वे रक्तदान आणि शाळकरी मित्र

माझगाव डॉक मधील इंजिनीअरिंग वर्कर्स असोसिएशन आणि जिव्हाळा प्रतिष्ठान मुरबाड यांच्या वतीने फाउंडर युनियन लीडर माननीय डॉ दत्ता सामंत यांच्या ८९ व्या जन्मदिनाप्रीत्यर्थ  माझगाव डॉक येथे महारक्तदान शिबीर आयोजित करण्यात आले होते. वरील संस्थांचे जनरल सेक्रेटरी श्री संजय कोळवणकर माझे शाळकरी मित्र...

या रक्तदान शिबिराला संजयने अगत्याचे आमंत्रण दिले होते... शाळकरी मित्रांना सुद्धा बोलावले होते...

गेली २४ वर्ष सलगपणे रक्तदान शिबिर आयोजित करणे आणि मुंबईतील पाच रक्तपेढ्यांना सुमारे १२०० रक्त पिशव्या मिळवून देण्याचे प्रचंड मोठे सामाजिक कार्य संजय आपल्या सहकारी मित्रांच्या सोबतीने करत आहे...

अशा महान कार्यात आज माझा खारीचा वाटा समाविष्ट होणार होता... आज रक्तदानाची १०७ वी वेळ होती... या उपक्रमात  KEM रक्तपेढीचा समावेश असल्यामुळे विशेष आनंद झाला... 

सकाळी साडेआठ वाजता माझगाव डॉकला सहकुटुंब पोहोचताच; संजय आणि त्याच्या मित्र परिवाराने सहर्ष स्वागत केले... KEM च्या रक्तपेढी अधिकारी श्रीमती ससाणे मॅडम यांची भेट झाली... त्यांनी रक्तदान करण्याचा फॉर्म आणि सर्व चाचण्या याची तातडीने पूर्तता केली... 

व्हाईस ऍडमिरल आणि माझगाव डॉकचे चीफ ऑफिसर श्री नारायण प्रसाद,  विद्यमान युनियन अध्यक्ष श्री भूषण सामंत तसेच उपाध्यक्ष श्री वर्गीस चाको आणि परममित्र, सरचिटणीस श्री संजय कोळवणकर यांच्या हस्ते दिप प्रज्वलन करून रक्तदान शिबिराला सुरुवात झाली...

संजयने युनियनच्या कार्याचा सर्वांना परीचय करून दिला... व्हाईस ऍडमिरल श्री नारायण प्रसाद यांनी माझगाव डॉकला आशियातील नंबर एक ची शिप बिल्डींग यार्ड बनविण्याचे ध्येय ठेवले आहे... श्री सामंत साहेबांनी युनियन तसेच सर्व कामगार यांचे प्रशासनाला सर्वोतोपरी सहकार्य असेल असे आश्वासन दिले... संजयने माझ्या प्रदूषण मुक्त भारत  या सायकल वारीचा, नुकत्याच पार पाडलेल्या मुंबई ते दिल्ली सायकल वारीचा, तसेच १०७ व्या रक्तदान उपक्रमाचा परिचय सर्वांना करून दिला. या प्रसंगी शाळकरी मित्र कुणाल ठाकूर, दिलीप काळे आणि शरद पाटील सहकुटूंब हजर होते. याचा खूप आनंद झाला...

आता सुरू झाला रक्तदानाचा कार्यक्रम... सर्व मान्यवरांच्या आणि शाळेतील मित्रांच्या उपस्थितीत माझे १०७ वे रक्तदान पाच मिनिटात पूर्ण झाले...

या वेळी व्हाईस ऍडमिरल श्री नारायण प्रसाद आणि अध्यक्ष श्री भूषण सामंत यांच्या समवेत रक्तदान करताना फोटो काढले...

रक्तदान पूर्ण झाल्यावर परममित्र संजयने शाल श्रीफळ देऊन सन्मान केला...

शाळेतील मित्रांच्या उपस्थितीत केलेला हा सन्मान लाख मोलाचा आहे...

आजचा विशेष दिवस कायम स्मरणात राहील...

सतीश जाधव

मुक्त पाखरे...