सिद्धिविनायक राईड

सिद्धिविनायक राईड

११ ऑक्टोबर,२०२०

आजची राईड खास चिरागसाठी आयोजित केली होती. सकाळी पावणे सहा वाजता चिराग प्रिन्ससह ठाण्यावरून निघाला. पूर्व द्रुतगती महामार्गावरून दादर मार्गे बरोबर सात वाजता सिद्धिविनायक मंदिराकडे आला. चिरागला आज १०० किमी राईड करायची होती. 

मंदिराजवळ फोटो काढून सुरू झाली सायकल राईड. प्रभादेवी मार्गे आम्ही वरळी चौपाटीवर आलो.  सिलिंक आता हाजी अली पर्यंत नेण्याचे काम प्रगतीपथावर असल्यामुळे वरळी चौपाटीला मोठे मोठे पत्रे मारून समुद्र दिसेनासा केला आहे. 

एका हातात छत्री आणि दुसऱ्या हातात पुस्तक असलेल्या कॉमन मॅन बरोबर  फोटो काढले.

 प्रिन्सचा मित्र सिलिंक कॉर्नरला येणार होता.  तेथे थांबून सिलिंकच्या बॅगराऊंडवर चिरागचे फोटो काढले. 

एक वळसा मारून पोतदार हॉस्पिटलच्या कॉर्नरला चहा पिण्यासाठी हायड्रेशन ब्रेक घेतला. सकाळी सायकलिंग सुरू करताना एखादे फळ, खजूर, लाडू, ड्रायफ्रुट असे काहीतरी खाणे आवश्यक असते. प्रिन्स काहीही न खाता जवळपास तीस किमी राईड करून वरळीला होता. चिराग थोडेसे खाऊन आला होता. दोघांना पौष्टिक लाडू (भूक लाडू) खायला दिले. टपरीवरच्या मामाला मसालेदार चहाची ऑर्डर दिली. अतिशय फक्कड चहा होता. 

आता सुरू झाली गिरगाव चौपाटीकडे सायकल राईड. भूक लाडुमुळे दोघांची एनर्जी बुस्ट झाली होती. टॉप गियरवर जोरदार राईड सुरू झाली. आज खूप हौशे नवसे, गवसे सायकलिस्ट दिसत होते. काही तुरळक सायकलिस्टच्या डोक्यावर हेल्मेट होते. ज्यांच्या डोक्यावर हेल्मेट नव्हते अशांना सुप्रभात स्माईल देत, हेल्मेट घालून सायकलिंग करा अशी विनंती करत होतो. 

महालक्ष्मी कडून पेडर रोडचा चढाव आम्ही जोरकसपणे चढून गेलो. पुढचा फ्लाय ओव्हर ब्रिज बंद असल्यामुळे ब्रिज खालून टर्न मारून प्रियदर्शिनी बगीच्याकडे आलो. आता सुरू झाला मुख्यमंत्र्यांच्या वर्षा बंगल्याचा चढाव.  हा चढाव येऊरची आठवण करून देणारा आहे. बजरंगबलीचे नाव घेऊन या लूपवर तिघांनी जोरदार चढाई केली. टॉपला येईपर्यंत मस्त दमछाक झाली होती. चिराग उस्फुर्तपणे म्हणाला 'एक नंबर चढाई'. 

तीन बत्ती नाक्यावर पोहोचलो. तीन बत्तीला अतिशय शार्प यु टर्न आहे. तो पार केल्यावर राजभवनच्या उतारा वरून अतिशय वेगात सायकली पळू लागल्या. बाबूलनाथ सिग्नल ओलांडून गिरगाव चौपाटीवर आलो. चिराग आणि प्रिन्सला सांगितले, आता स्वतःला अजमावण्याची संधी आहे. आपल्यात किती दम आहे, याची तपासणी आता करा, पळवा सायकली...

भन्नाट वेगात तिघांच्या सायकली पळू लागल्या. इतर सर्व सायकलिस्ट भराभर मागे पडत होते. आज गिरगाव चौपाटी पासून मारिन लाईन्स पर्यंत सायकलींची  खूप गर्दी होती. दहा मिनिटात NCPA ला पोहोचलो. तेथे दोघांना ग्लुकोन डी दिले, एनर्जी आणखी बुस्ट होण्यासाठी.

तेथे वळसा मारून चर्निरोड चौपाटीवर हायड्रेशन ब्रेक घेतला. समुद्रालगतच्या कठड्यावर सायकल घेऊन खूप फोटोग्राफी केली. दोघांना पुन्हा भूकलाडू खायला दिला. 

 आजच्या सायकल सफरीमध्ये शंभर किमी सायकलिंग करायची हे चिराग आणि प्रिन्स ठरवून आले होते. त्यामूळे त्यांना मुंबईच्या वेगवेगळ्या रस्त्याने फिरवावे, हे माझ्या डोक्यात आले. चर्निरोड चौपाटीवरून बाबूलनाथ मंदिराकडून पेडर रोडला वळसा मारल्यावर पारसी डुंगरवाडीचा कोसळलेला भाग दोघांना दाखविला. मोठे मोठे दगड धोंडे अजूनही रस्त्यावर पडलेले होते. तेथून जसलोकचा चढ चढून महालक्ष्मी मंदिराकडे आलो. 

पुढे वरळी नाका गाठल्यावर, दूरदर्शन टॉवर कडून पांडुरंग बुधकर मार्ग गाठला. प्रभादेवी पुलावरून परेल गाठले. दादर हिंदमाता आल्यावर चिराग आणि प्रिन्स यांना टाटा केला आणि पुढच्या ठाण्यापर्यंत सफारीच्या शुभेच्छा देऊन घराकडे परतीची सफर   सुरू झाली.

आजची सायकल सफर सिद्धिविनायक मंदिर, महालक्ष्मी मंदिर,  प्रियदर्शिनी बगीचा, तीन बत्ती नाका,  बाबूलनाथ, गिरगाव चौपाटी, मारिन लाईन्स चौपाटी, हिंदमाता या सर्व स्थळांची ठाणेकरांना पुन्हा एकदा ओळख करून देण्यासाठी होती. खूप समाधान वाटले आजच्या राईडमुळे !!!

चिराग आणि प्रिन्सची शंभर किमी राईडची आकांक्षा आज नक्कीच पूर्ण होणार होती.

सतीश जाधव

आझाद पंछी...