हिमालयाची सावली... दिवाळीला पावली... दि.२१.१०.२०२५

हिमालयाची सावली... दिवाळीला पावली...

दि. २१.१०.२०२५

दिवाळीच्या मोठ्या दिवशी सायकलिंग परममित्र जयंती गाला याच्या गिरगाव येथील घरी  जितेंद्र आणि जयेश यांच्या बरोबर सदिच्छा भेट दिली.

नवरात्रीमध्ये जयंतीचा पाय मुरगळल्यामुळे त्याला दुखापत झाली होती... आणि डॉक्टरांनी त्याला दोन महिने आराम करण्यास सांगितले होते... जयंतीने घरात बसणे म्हणजे वाघाला पिंजऱ्यात बंद करणे होते... पण जयंतीने वॉकरवर चालत येऊन आमचे स्वागत केले... त्याच्या जिद्दीने आणि उत्साहाने सर्वांना प्रेरित केले...

बोलण्यातली त्याची ऊर्जा अजूनही तितकीच तेजस्वी होती, आणि फोटो काढणे हे त्याचे आवडते काम अजूनही त्याला आनंद देत होते.

त्याच्या भेटीबरोबर त्याच्या वडिलांचीही भेट झाली. अर्धांगवायूमुळे गेली पंधरावर्ष अंथरुणात असलेले ८५ वर्षांचे बाबा म्हणजे खरा चमत्कार होते... सतत अंथरुणात असूनही त्यांना कुठेही बेडसोर नव्हता की चेहऱ्याचे तेज कमी झालेले नव्हते.... त्यांच्या जोडीला होता परमेश्वर नावाचा सेवक...आणि जयंती सारखा मुलगा... पंधरावर्ष जयंतीने दिलखुलासपणे वडिलांची सेवा केली आणि अजून करतो आहे... त्याची चिकाटी आणि मनाची उर्मी पाहून आम्ही सर्व सायकलिस्ट स्तिमित झाले होतो...

एक फोटो काढला तेव्हा जयंतीच्या वडिलांच्या  चेहऱ्यावर उमटलेली हास्याची लकेर मनात खोलवर घर करून गेली.

असा मित्र आणि त्याचे पितृतुल्य वडील... आपत्कालीन परिस्थितीत कसे जगायचे... प्रेमाने आणि धैर्याने कसे वागायचे याचा अमूल्य धडा देत होते...  अशा व्यक्तींचे आपल्या जीवनात अस्तित्व असणे हिच खरी श्रीमंती होती...

आज खरं तर सर्ली सायकलचेही आभार मानायला हवेत, ज्यामुळे जयंतीच्या अंतरंगाची जवळून ओळख होऊ शकली...

आजचा दिवाळीचा दिवस आभाळापेक्षा मोठा झाला होता...  आणि तो अंत:करणाला उजाळणारा अनुभव देणारा ठरला...

एक हिमालय आणि तितकीच मोठी सावली... याचे प्रत्यंतर आले होते...

सतीश जाधव

7977690693